بىزدە جۇمىس ورنى مەن جالاقى قىسقارمايدى

  ەل ۇكىمەتىنىڭ كەڭەيتىلگەن جيىنىندا ەلباسى 2014 جىلى اتقارىلعان جۇمىستاردى قورىتىندىلاپ جانە بيىلعى اتقارىلاتىن ىستەرگە شولۋ جاساي وتىرىپ, كوپتەگەن مىندەتتەر جۇكتەدى. ەلباسىنىڭ اسىرەسە, الەۋمەتتىك ماسەلەلەرگە نازار اۋدارىپ, جۇمىس ورىندارى مەن جالاقى كولەمىن قىسقارتپاۋ تۋرالى تاپسىرمالارى بارشا جۇمىس بەرۋشىلەرگە وي سالادى دەگەن سەنىمدەمىن. بۇل باعىتتا ءبىزدىڭ كاسىپورىن دا ءبىراز تىرلىكتەر اتقاردى. «قازفوسفات» نەگىزىنەن ەكسپورتتىق كومپانيا بولىپ ەسەپتەلەدى. ياعني, ءونىمنىڭ 94 پايىزى شەتەلدەرگە وتكەرىلەدى. كومپانياعا قاراستى 7 زاۋىتتا 6 200-دەن استام جۇمىسشى ەڭبەك ەتۋدە. ەلىمىزدىڭ اۋماعىندا فوسفات ءوندىرىپ, ونى وڭدەپ, تۇتىنۋشىلارعا تەمىرجول كولىگى ارقىلى جەتكىزىپ بەرەتىن بىرەگەي كومپانيانىڭ ءبىرى. بۇگىندە مۇندا مينەرالدىق تىڭايتقىش, سارى فوسفور, حيميا ونىمدەرىنىڭ 20 ءتۇرى وندىرىلەدى. ازىرگە نەگىزگى تابىستىڭ 60 پايىزى سارى فوسفور ساتۋدان تۇسۋدە. قازىر ءونىمىمىز ەۋرووداق, تمد, قىتاي, جاپونيا, يران, اۋعانستان جانە ۇندىستانعا جىبەرىلۋدە. ايتسە دە, نارىق تالابى – قاتال. الەمدىك قارجى داعدارىسى ءبىزدىڭ كومپانيانىڭ جۇمىسىنا دا زيانىن تيگىزبەي وتىرعان جوق. سوندىقتان دا, ءبىز وزىمىزدە وندىرىلەتىن ءونىمنىڭ ساپاسىن تۇراقتى جاقسارتىپ, باسەكەگە قابىلەتتىلىگىنە ەرەكشە كوڭىل بولەمىز. زاۋىتتىڭ بۇگىنگى تاڭداعى ەڭ باستى تۇتىنۋشىسى – ەۋروپا وداعى ەلدەرى. ونان سوڭ تمد-عا مۇشە مەملەكەتتەر. وتكەن جىلمەن سالىستىرعاندا زاۋىت ونىمدىلىگى بيىل ايتارلىقتاي ارتتى. جوعارىدا ايتقانىمىزداي, الەمدىك نارىقتاعى كەيبىر قيىندىقتارعا بايلانىستى ءونىمدى وتكەرۋدىڭ ماسەلەسى دە جوق ەمەس. سوعان قاراماستان كاسىپورىن الداعى جىلى ەكستراكتسيالى فوسفور قىشقىلىن شىعاراتىن جاڭا ءوندىرىستىڭ العاشقى كەزەڭىن اياقتاۋدى جوسپارلاپ وتىر. ياعني, 2016 جىلدان باستاپ فوسفور تىڭايتقىشتارى ءۇش ەسەگە كوپ شىعارىلادى. ال, ەكىنشى كەزەڭى 2020 جىلى ءبىتىپ, كومپانيا 1 ميلليون تونناعا جۋىق تىڭايتقىش شىعاراتىن بولادى. جاقىندا عانا جامبىل وبلىسىنىڭ اكىمدىگى, كاسىپورىن باسشىلارى جانە كاسىپوداق كوميتەتتەرى ءوزارا ىنتىماقتاستىق تۋرالى ەكى باعىتتاعى بىرنەشە كەلىسىمدەرگە قول جەتكىزدىك. بۇل قۇجاتتاردىڭ باس­تى ماقساتى – جۇمىسشىلاردىڭ ەڭبەك قۇقىقتارى مەن كەپىلدىگىن قامتاماسىز ەتۋ. سوندىقتان, ءبىزدىڭ كاسىپورىندا جۇمىس ورنىن, جالاقى كولەمىن قىسقارتۋ دەگەن بولمايدى. وسىعان ۋادە بەرەمىن. مۇقاش ەسكەندىروۆ, «قازفوسفات» جشس باس ديرەكتورى, جامبىل وبلىستىق ءماسليحاتىنىڭ دەپۋتاتى. تاراز.